Тәуелсіздік күніне орай ұйымдастырылған VIII спартакиада басталды!
Құрметті спорт сүйер қауым! Астана қаласында энергетика саласы мен коммуналдық қызмет көрсету мекемелері арасындағы 8-ші жыл сайынғы өткізілетін Спартакиаданың басталғанын қуана хабарлаймыз. Спорттық рух пен жігерге толы бұл шара командалардың арасындағы достықты нығайту және кіл жүйрікті анықтау мақсатында ұйымдастырылып отыр. Спартакиада салауатты өмір салтын ұстануға арналған дәстүрлі сайыс қана емес, сонымен қатар еліміздің маңызды күндері — Қазақстан Республикасының Тәуелсіздік мерекесі және Энергетиктер күнімен байланысқан шара. Биылғы жылы Спартакиадада қаладағы жеті ірі мекеменің командалары бақтарын сынайтын болады. Олардың қатарында тұрақты қатысушыларымыз — «Астана-РЭК», «Астана-Энергия», «Астана-Теплотранзит», Астана Су Арнасы», сонымен қатар «Астанаэнергосбыт», «Астана Тазалық» және «Elorda Eco System» командалары бар. Спартакиада бағдарламасына волейбол, футбол, үстел теннисі, дойбы, шахмат, тоғызқұмалақ және гір көтеру сияқты спорт түрлері енгізілген. Жарыс «АстанаТеплотранзит» АҚ-ның спорттық алаңында өтіп жатыр. Аталмыш жарыстың ашылуы волейбол ойындарымен басталып, алдағы бір ай бойы өзге спорт түрлерінен ұйымдастырылған сайыстармен жалғасын табады . Спартакиада тек спорттық сайыс қана емес, сонымен бірге әріптестер арасында командалық рухты көтеруге, жаңа таныстықтар орнатуға және арадағы қарым-қатынасты нығайтуға тамаша мүмкіндік. Барлық қатысушыларға шабыт, сәттілік және жарқын спорттық жетістіктер тілейміз. Әр сайыс қуаныш пен ұмытылмас әсерлер сыйласын!