Су тасқыны кезеңіне дайындық: айналма коллектордың құрылысы
Астанада су тасқыны кезеңіне дайындық жұмыстары жалғасуда. Жыл сайын қала халқының саны артып, жаңа нысандар көбейіп жатыр. Бұл өз кезегінде кәріздік тазарту құрылғыларына түсетін жүктеменің өсуіне әкеледі.
Бүгінде қаланың басты сорғы станциясына келіп түсетін ағынды сулардың көлемі тәулігіне 300 мың текше метрден асады. Бұл жобалық қуаттан 50 мың текше метрге артық.
Осыған байланысты айналма коллектор салу туралы шешім қабылданды. Оның негізгі мақсаты – қаланың су басу қаупінің алдын алу және тазарту құрылыстарының үздіксіз жұмысын қамтамасыз ету.
Айналма коллектордың құрылысы – «Астана Су Арнасы» МКК-ның су тасқыны кезеңіне дайындығы аясындағы басты іс-шараларының бірі. Кәсіпорын мамандары құрылысты қадағалап, қаладағы су бұру жүйесінің тұрақты жұмыс істеуі үшін барлық қажетті шараларды қабылдауда.