Қазақстанда сумен жабдықтау және су бұру жүйелерін пайдалану ережелері жаңартылды
2025 жылғы 20 қыркүйектен бастап Қазақстанда Өнеркәсіп және құрылыс министрінің 2025 жылғы 29 тамыздағы бұйрығымен бекітілген Елді мекендерді сумен жабдықтау және су бұру жүйелерін пайдалану жөніндегі жаңа қағидалар күшіне енеді.
Тұтынушылар үшін не өзгереді:
• Сумен жабдықтау және су бұру қызметтері үздіксіз көрсетілуі тиіс. Шектеулер тек заңда көзделген жағдайларда ғана мүмкін.
• Басымдық – халықты ауыз сумен қамтамасыз ету.
• Техникалық шартсыз немесе шарттың қолданылу мерзімі аяқталғаннан кейін желілерге қосылымдарды пайдалануға болмайды.
• Қызметтер үшін төлем бекітілген әдістеме бойынша есептеледі. Тұтынушының өтініші негізінде, растайтын құжаттар болған жағдайда, қайта есеп жүргізілуі мүмкін.
Заңды тұлғалар мен кәсіпкерлер үшін:
• Техникалық қажеттіліктерге ауыз су пайдаланатын кәсіпорындар қайталама сумен жабдықтау жүйелерін енгізуге міндетті.
• Ағынды суларды ағызу кезінде тазарту құрылыстары және ластаушы заттардың рұқсат етілген шоғырлануы туралы деректерді ұсыну қажет.
Елді мекендердегі жұмыстар
• Қар тазалау және аумақты абаттандыру жұмыстарын жүргізетін мердігерлер құдықтар мен люктер болған жағдайда жұмысты су жеткізушімен келісуі тиіс.
• Жеткізушілер техникалық су пункттерін (көшелерді суару және жуу үшін), сондай-ақ ағынды суларға арналған төгу станцияларын ұйымдастырады.
Шарттар мен рәсімдеу
• Барлық қызметтер тек шарт негізінде көрсетіледі.
• Көпқабатты үйлер тұрғындары үшін – жария немесе жеке шарт (жазбаша немесе электрондық нысанда).
• Жеке үйлер, заңды тұлғалар және ЖК үшін – жеке жазбаша шарт.
• Қол қою SMS, электрондық қолтаңба немесе планшет-қолтаңба арқылы жүзеге асырылуы мүмкін.
Шарттар келесі мерзімдерде жасалады:
• жеке тұлғалармен – жүйеге қосылған күннен бастап;
• заңды тұлғалармен және ЖК-мен – жүйе пайдалануға берілгеннен кейін 10 күн ішінде;
• түпкілікті – өтініш берілгеннен кейін 15 күннен кешіктірмей.